Um Mimi
Mimi bækurnar komu fyrst út árið 2013 þegar Hanna Kristín Skaftadóttir stóð frammi fyrir þeirri áskorun að yngri sonur hennar glímdi við sértæka málhömlun. Hanna Kristín sökkti sér í lestur fræðigreina um málhamlanir og tileinkaði sér aðferð sem kallast tákn með tali (TMT), sem er tjáskiptaaðferð sem var upphaflega þróuð fyrir börn með málþroskaröskun. Í kjölfar útgáfu fyrstu bókanna fór Hanna Kristín í nám í málvísindum og þroskasálfræði barna við Stanford háskóla í Bandaríkjunum sem hún nýtti til að þróa aðferðina frekar. Gefnar voru út sjö bækur á níu mánuðum og hafa þær notið mikilla vinsælda meðal aðstandenda og fagfólks.
Í maí 2020 komu út fjórar nýjar bækur um Mimi og félaga og í júlí 2020 kom út rafrænt grunnnámskeið í tákn með tali fyrir aðstandendur. Sambærilegt námskeið fyrir fagfólk sem starfar með ungum börnum er áætlað að verði sett í loftið haust/vetur 2020.
Teymið
hanna kristín skaftadóttir, stofnandi
Hanna Kristín hóf að þróa Mimi verkefnið árið 2012 þegar sonur hennar greindist með sértæka málhömlun, en hún starfaði á endurskoðunarskrifstofu á þeim tíma. Hún er með Msc. gráðu í endurskoðun og reikningshaldi og Bsc. gráðu í viðskiptafræði og stundar núna doktorsnám í upplýsingatækni í endurskoðun (e. accounting information systems).
benedikt bjarni melsted
Benedikt er nemandi í 10. bekk í Valhúsaskóla og byrjaði að taka námskeið hjá Myndlistaskólanum í Reykjavík á leikskólaaldri. Myndasöguteikningar og persónusköpun hefur verið helsta áhugasvið Benedikts í nokkur ár. Hann hefur skrifað og teiknað þó nokkurn fjölda myndasagna, sem þykja mjög fyndnar og fjalla oftar en ekki um ofurhetjur, og heldur úti rás á youtube undir nafninu KB ART.
mikael björn melsted
Mikael er nemandi í 8. bekk í Valhúsaskóla. Upphafleg persóna Mimi byggir á honum þar sem nafn persónunnar er dregið af nafni Mikaels : Mi + Mi. Líkt og bróðir sinn hefur Mikael mjög gaman af því að teikna en er þó meira í því að lita teikningar bróður síns.